ՀՀ Կառավարության որոշմամբ Ղարաբաղից տեղահանված ընտանիքների բնակարանային ապահովման պետական աջակցության ծրագրում կատարվել են էական փոփոխություններ, որոնք ուղղված են ծրագրի արդյունավետության բարձրացմանը և շահառուների համար առավել ճկուն ու մատչելի պայմանների ապահովմանը։

Փոփոխությունների արդյունքում հավաստագրերի արժեքը ընտանիքի մեկ անդամի հաշվով կազմում է`

• 5 մլն դրամ, եթե ձեռք բերեք կամ կառուցեք Ձեր տունը/բնակարանը 242 քաղաքային և գյուղական բնակավայրերից որևէ մեկում (ՀՀ առանձին բնակավայրերի ցանկի հավելված 2),
• 4 մլն դրամ, եթե ձեռք բերեք կամ կառուցեք Ձեր տունը/բնակարանը  վերոնշյալ 242 բնակավայրերից բացի՝ ՀՀ ցանկացած այլ մարզային բնակավայրում,
• 3 մլն դրամ՝ Երևան քաղաքում՝ բացի Երևանի 1-ին և 2-րդ գոտու,
• 2 մլն դրամ, եթե մայիսի 16-ի դրությամբ ունեք գործող հիփոթեք, բացառությամբ՝ Երևանի 1-ին և 2-րդ գոտում գտնվող գույքի, իսկ 2024 թվականի մայիսի 16-ից հետո, բայց մինչև 2025 թվականի հուլիսի 1-ը ներառյալ ձևակերպված հիփոթեքային վարկ ունենալու դեպքում՝ աջակցությունն ընտանիքի յուրաքանչյուր անդամի հաշվով կազմում է 3 մլն դրամ։

Սահմանվել է նաև հավաստագրերի գործողության ժամկետը՝ մինչև 2028 թվականի դեկտեմբերի 31-ը։ 

Ծրագրի այլ մանրամասներին կարող եք ծանոթանալ հարթակի «Ղարաբաղից տեղահանված ընտանիքների բնակարանային ապահովման պետական աջակցության ծրագիր» էջում։

Փոփոխություններ են արվել նաև Ղարաբաղի առանձին շրջաններից տեղահանվածների բնակարանային ապահովման ծրագրի պայմաններում։ Մասնավորապես, սահմանվել է հավաստագրերի գործողության նոր ժամկետը։ Նոր պայմաններով հավաստագրերը կգործեն մինչև 2026 թվականի դեկտեմբերի 31-ը։

Ծրագրի այլ պայմաններին կարող եք ծանոթանալ հարթակի «Ղարաբաղի առանձին շրջաններից տեղահանվածների բնակարանային ապահովման ծրագիր» էջում։