ՀՀ Կառավարությունը գնաճի պայմաններում գյուղատնտեսությունում տնտեսավարողներին շուկայական գներից մատչելի գներով պարարտանյութեր ձեռք բերելու համար աջակցության ցուցաբերման անհրաժեշտությամբ պայմանավորված գործարկել է աջակցության նոր ծրագիր։

Ծրագրի շրջանակում մեկ շահառուի հաշվով պարարտանյութ կտրամադրվի առավելագույնը 30 հեկտար հողատարածքում մշակություն իրականացնելու համար։ Հողամասի նկատմամբ համասեփականատերերի առկայության դեպքում ծրագրից կարող է օգտվել համասեփականատերերից միայն մեկը։

Ծրագիրն իրականացվելու է մատակարարների կողմից շահառուներին վաճառվող պարարտանյութի վաճառքի գնի սուբսիդավորմամբ կամ փոխհատուցմամբ (եթե 50 կգ քաշով 1 պարկ պարարտանյութի վաճառքի գինը գերազանցում է 8000 դրամը)՝ 50 կգ քաշով 1 պարկ պարարտանյութի վաճառքի գնի և 8000 դրամի տարբերության չափով,  բայց ոչ ավելի,  քան 50 կգ քաշով 1 պարկի հաշվով՝ 3000 դրամը: Մատակարարների կողմից պետք է վաճառվեն հետևյալ պարարտանյութերը․

• ազոտական պարարտանյութ՝ ամոնիակային սելիտրա, կարբամիդ.
• ֆոսֆորական պարարտանյութ՝ սուպերֆոսֆատ․
• կալիումական պարարտանյութ՝ կալիումի քլորիդ․
• համակցված պարարտանյութեր՝ ամոֆոս, նիտրոամոֆոսկա։

 Աջակցության տրամադրման պայմաններին, դիմելու կարգին և այլ մանրամասներին կարող եք ծանոթանալ հարթակի «Պարարտանյութերի ձեռքբերման աջակցության ծրագիր» էջում։