Ծրագրով հաստատվում է ընտանեկան և կենցաղային բռնության ենթարկվածներին ժամանակավոր աջակցության հաշվեհամարի բացման և տնօրինման կարգը: Առաջարկվող մոդելը լուծում է ընտանեկան և կենցաղային բռնության ենթարկված անձի հրատապ աջակցության խնդիրը՝ վերջինիս տրամադրելով միանվագ դրամական աջակցություն՝ հիմնված չափորոշիչներով սահմանված կարիքի գնահատման վրա։ Մոդելի հիմքում շահառուի և նրա խնամքի տակ գտնվող խնամառուների կենսական նվազագույն պայմանների ապահովման գաղափարն է։

Միանվագ դրամական աջակցությունից օգտվելու համար ընտանեկան և կենցաղային բռնության ենթարկված անձը կարող է պաշտոնական դիմում ներկայացրել ՀՀ աշխատանքի և սոցիալական հարցերի նախարարությանը ինչպես էլեկտրոնային, այնպես էլ թղթային տարբերակով։ Ծրագրի մասին այլ մանրամասների կարող եք ծանոթանալ պետական աջակցության ծրագրերի իրազեկման հարթակի՝ «Ընտանեկան և կենցաղային բռնության ենթարկվածների ժամանակավոր աջակցության ծրագիր» էջում։