ՀՀ առողջապահության նախարարությունը մարդասիրական օգնություն է ստացել ևս մեկ թանկարժեք դեղամիջոց, որը բժշկական ցուցումով, անվճար կտրամադրվի դրա կարիքն ունեցողներին։ Ռիտուքսիմաբ ակտիվ նյութ պարունակող դեղերի կիրառումը ստանդարտ քիմիաթերապիայի ժամանակ ամբողջ աշխարհում համարվում է B-բջջային ոչ հոջկինյան լիմֆոմաների բուժման ոսկե ստանդարտ և հանդիսանում է բուժման կարևորագույն բաղադրիչ։ Բուժման արդյունքում բարելավվում է այս պացիենտների ընդհանուր ապրելիությունը` 50-70%-ից դարձնելով մինչև 90%։

Հայաստանում տարեկան ախտորոշվում է շուրջ 180 առաջնակի ոչ հոջկինյան B-լիմֆոմա։ Ժամանակակից գործելակարգերով նրանց բուժումը կազմակերպելու համար այս օժանդակությամբ կթեթևանա պացիենտների ֆինանսական բեռը` ապահովելով առավել արդյունավետ բուժում: Ծրագրի մասին այլ մանրամասների կարող եք ծանոթանալ պետական աջակցության ծրագրերի իրազեկման հարթակի՝ ««Ռիաբնի (Ռիտուքսիմաբ-ARRX Լ-Թ Ն/Ե 100ՄԳ/10ՄԼ)» դեղով հիվանդության բուժման ծրագիր» էջում։