Ծրագրի նպատակն է ՀՀ ՊՆ համակարգի սպայական և ավագ ենթասպայական կազմերի պայմանագրային զինծառայողների բնակարանային ապահովմանն խնդրի լուծմանն աջակցելը՝  բնակարանի կամ բնակելի տան ձեռքբերման կամ բնակելի տան կառուցման համար հիպոթեքային վարկավորման մատչելի և արտոնյալ պայմանների ապահովման եղանակով։

Ծրագրի շրջանակում պետությունը զինծառայողներին տրամադրում է ֆինանսական աջակցություն՝ հիփոթեքային վարկերի գծով տոկոսագումարի սուբսիդավորման, վարկի ստացման նպատակով կանխավճարի, իսկ անմիջապես կառուցապատողից բազմաբնակարան բնակելի շենքում կառուցված կամ կառուցվող բնակարան կամ կառուցվող բնակելի տուն ձեռք բերելու դեպքում՝ նաև վարկի վճարված տոկոսագումարի փոխհատուցման նպատակով եկամտային հարկի վերադարձի, ինչպես նաև օրենքով նախատեսված դեպքերում՝ վարկի մայր գումարի մարման տեսքով։

Ծրագրի շրջանակներում բնակարանի կամ բնակելի տան կամ կառուցվող բնակելի տան արժեքի առավելագույն չափը 28.500.000 ՀՀ դրամ է, ընդ որում, բնակելի տան արժեքը սահմանվում է որպես գնահատված և ձեռքբերման արժեքներից նվազագույնը: Սահմանված առավելագույն չափից ավելի լինելու դեպքում` պետության կողմից աջակցությունը ցուցաբերվում է միայն սահմանված առավելագույն արժեքի սահմաններում, ընդ որում, բնակելի տուն կառուցելու նպատակով սույն ծրագիրը գործում է` զինծառայողի անվամբ սեփականության (համատեղ կամ բաժնային սեփականության) իրավունքով գրանցված տնամերձ կամ բնակելի։
Ծրագրի շրջանակում պետության կողմից կանխավճարի գծով պետական աջակցության չափը կազմում է՝

• անմիջապես կառուցապատողից բազմաբնակարան բնակելի շենքում կառուցված կամ կառուցվող բնակարան, կամ կառուցվող բնակելի տուն ձեռք բերելու դեպքում կանխավճարի գծով պետական աջակցության չափը կազմում է 2.500.000 դրամ, և ֆինանսավորվում է պետության կողմից, իսկ վարկերը տրամադրվում են ձեռք բերվող (կառուցվող) բնակարանի կամ անհատական բնակելի տան արժեքի մինչև 90 տոկոսի չափով,
• երկրորդային շուկայից (ոչ անմիջապես կառուցապատողից) բազմաբնակարան բնակելի շենքում բնակարան կամ բնակելի տուն ձեռք բերելու դեպքում կանխավճարը կազմում է ձեռք բերվող բնակարանի (բնակելի տան) արժեքի 30 տոկոսը։ Կանխավճարի գծով պետական աջակցության չափը կազմում է 2.500.000 դրամ։

Վարկի տարեկան տոկոսադրույքը`

• անմիջապես կառուցապատողից բազմաբնակարան բնակելի շենքում կառուցված կամ կառուցվող բնակարան, կամ կառուցվող բնակելի տուն ձեռք բերելու դեպքում՝ առավելագույնը 11 տոկոս, որից պետության կողմից սուբսիդավորվում է վարկի տոկոսագումարի 5 տոկոսային կետը: Վարկառուն իրավունք կունենա պետությունից հետ ստանալու իր վճարած (հարկային գործակալի կողմից պահված) եկամտային հարկը` ծրագրի շրջանակում հիփոթեքային վարկի դիմաց իր կողմից վճարված (պետության կողմից չսուբսիդավորված) տոկոսների չափով։
• երկրորդային շուկայից (ոչ անմիջապես կառուցապատողից) բազմաբնակարան բնակելի շենքում բնակարան կամ բնակելի տուն ձեռք բերելու դեպքում՝ առավելագույնը 13 տոկոս, որից պետության կողմից սուբսիդավորվում է վարկի տոկոսադրույքից՝ 5 տոկոսային կետը: Վարկառուի համար հիփոթեքային վարկի տարեկան տոկոսադրույքի վրա չի տարածվում իր վճարած (հարկային գործակալի կողմից պահված) եկամտային հարկի վերադարձման պայմանը։

Ծրագրի շահառու կարող են դառնալ ՊՆ համակարգի սպայական և ավագ ենթասպայական (ենթասպա, ավագ ենթասպա կոչում կրողներ) կազմերի պայմանագրային զինծառայողները։