Ծրագրի շրջանակում Ղարաբաղից տեղահանված անձանց ինքնազբաղվածության ապահովման նպատակով տրամադրվում է աջակցություն հետևյալ ուղղություններով՝

• շահառուի բիզնեսի ուսուցման դասընթացներ՝ մինչև 300,000 դրամ,
• շահառուի 12 ամիս (ամսական միջինում 10 ժամի համար) բիզնես ուղեկցում՝ ամսական 60,000 դրամ,
• գործարար ծրագրերի իրականացման համար դրամաշնորհների տրամադրում գործարար ծրագրով նախատեսված գումարի 70%-ի չափով, բայց ոչ ավելի, քան 2 մլն դրամը։ Գործարար ծրագրի իրականացման համար շահառուն կարող է ներգրավել նաև կապիտալ միջոցներ կամ տարածքի վարձակալության համար հավելյալ միջոցներ։

Ձեռնարկատիրական գործունեության մեկնարկի և իրականացման համար անհրաժեշտ բիզնեսի ուսուցման և ուղեկցման աշխատանքները կազմակերպվում են ՄՍԾ-ի կողմից կազմակերպությունների հետ կնքված հրապարակային օֆերտայի պայմանագրի հիման վրա։ Հրապարակային օֆերտայի պայմանագրեր կարող են կնքվել այն կազմակերպությունների հետ, որոնք ունեն բիզնես դասընթացներ կազմակերպելու և բիզնես ուղեկցում իրականացնելու առնվազն 3 տարվա փորձառություն։ Կազմակերպությունների ցանկը, հրապարակային օֆերտայի պայմանները, ինչպես նաև մատուցվող ծառայությունների շրջանակը հրապարակվում են ՄՍԾ պաշտոնական կայքէջում:

Ձեռնարկատիրական գործունեությունը 12 ամսից հետո ևս 6 ամիս գործելու դեպքում, եթե տարեկան շրջանառությունը կազմում է առնվազն 3 մլն դրամ, ծրագրի շրջանակում առաջարկվում է նաև շահառուին տրամադրել հիմնական միջոցի ձեռքբերման ծախսի փոխհատուցում՝ մինչև 1 մլն դրամի չափով՝ գնումը հավաստող փաստաթղթի առկայության դեպքում։
 

Ծրագրի շահառու կարող են լինել Ղարաբաղից տեղահանված այն անձինք, ովքեր բնակարանային աջակցության պետական ծրագրի շրջանակում ձեռք են բերել կամ կառուցել են բնակարան/բնակելի տուն, և վերջին 3 ամսվա ընթացքում չեն հանդիսացել հարկ վճարող։

Շահառու կարող է լինել յուրաքանչյուր ընտանիքի միայն 1 անդամը։