Ծրագրի շրջանակում ֆինանսական աջակցություն կտրամադրվի առևտրական (առք ու վաճառքի) գործունեություն իրականացնող շրջանառության հարկ վճարող տնտեսավարող սուբյեկտներին 2025թ.-ի հունվարի 1-ի դրությամբ առկա ապրանքային մնացորդները 2025թ.-ի հունվարի 1-ից հետո իրացնելու պարագայում առաջացող հարկային բեռի համաչափությունն ապահովելու նպատակով։ 

Նախատեսվում է տրամադրել  աջակցություն պետական բյուջե վճարման ենթակա շրջանառության հարկի այն մասի չափով, որը գերազանցում է իրացման շրջանառության 5%-ը: Իսկ այն հարկ վճարողներին, որոնք կունենան հարկից չնվազեցված և փոխհատուցված գումար, փոխհատուցվելու է նաև պետական բյուջե վճարման ենթակա շրջանառության հարկի և իրացման շրջանառության 1.5 տոկոսը կազմող գումարի դրական տարբերությունը: Կարևոր է նշել, որ այն չի կարող լինել ավելին, քան չնվազեցված գումարի 1.375-ապատիկը:

Աջակցությունը տրամադրվում է առևտրական (առք ու վաճառքի) գործունեություն իրականացնող շրջանառության հարկ վճարող տնտեսավարող սուբյեկտներին, եթե միաժամանակ բավարարված են հետևյալ պայմանները.

• 2024թ. իրականացրել է առևտրական (առք ու վաճառքի) գործունեություն.
• 2024թ. դեկտեմբերի 31-ի դրությամբ և աջակցության ստացման հաշվետու եռամսյակներում հանդիսացել է բացառապես շրջանառության հարկ վճարող.
• դիմումի ներկայացման օրվան նախորդող օրվա դրությամբ ամբողջությամբ կատարել է վճարման ենթակա շրջանառության հարկի պարտավորությունները.
• եռամսյակի արդյունքներով առևտրական գործունեությունից շրջանառության հարկի գումարը գերազանցում է այդ գործունեության մասով ձևավորվող իրացման շրջանառության 5 տոկոսը կամ հարկ վճարողի մոտ առկա է նախորդ եռամսյակներում կատարված ծախսերի մասով շրջանառության հարկի գումարից չնվազեցված և փոխանցված գումար.
• հարկային մարմին է ներկայացրել առևտրական գործունեության մասով 2025թ. հունվարի 1-ի դրությամբ ապրանքային մնացորդի մասին տեղեկատվություն։