Ծրագիրն ուղղված է աջակցելու երիտասարդներին մասնակցելու միջազգային տարատեսակ միջոցառումներին, ներկայացնելու իրենց փորձը, աշխատությունները, ինչպես նաև ձեռք բերելու նոր գիտելիքներ, զարգացնելու իրենց կարողությունները, որոնք հետագայում կծառայեն Հայաստանում:

Ծրագրին կարող են դիմել և ավիատոմսի ծախսի փոխհատուցում ստանալ 16-ից 30 տարեկան երիտասարդները կամ 16-ից 30 տարեկան երիտասարդներից կազմված՝ Նախարարության կողմից ձևավորված մինչև 5 հոգանոց պատվիրակության  անդամները՝ հետևյալ միջոցառումներին մասնակցելու համար․

• Երիտասարդներին կամ երիտասարդական hասարակական կազմակերպությունների անդամներին՝ միջազգային երիտասարդական միջոցառումներին, այդ թվում համաժողովներ, աշխատաժողովներ, լրացուցիչ և շարունակական կրթության դասընթացներ և երիտասարդների կարողությունների զարգացմանն ուղղված այլ միջոցառումներ, մասնակցության համար հետևյալ բովանդակային տիրույթում․

1. երիտասարդական աշխատողի վերապատրաստում,
2. երիտասարդական կենտրոնների գործունեության կազմակերպման մեթոդաբանություն,
3. ժողովրդավարական և քաղաքացիական կարողունակություն,
4. առաջնորդություն,
5. երիտասարդների ինքնակազմակերպում/համախմբում,
6. հակակոռուպցիոն մտածելակերպ,
7. ֆինանսական գրագիտություն,
8. մեդիագրագիտություն, թվային գրագիտություն և կիբեռգրագիտություն,
9. ոչ ֆորմալ կրթական գործիքակազմով մասնագիտական վերապատրաստման ծրագրեր,
10. մասնագիտական կողմնորոշման դասընթացներ,
11. ձեռնարկատիրական հմտություններ,
12. բնակչության պաշտպանության և աղետների ռիսկի կառավարման կարողությունների զարգացմանն ուղղված միջոցառումներ,
13. առողջ ապրելակերպ,
14. փափուկ հմտություններ։

• Երիտասարդ մասնագետներին՝ կրթական, գիտական, մշակութային, մարզական և հանրային կյանքի այլ ոլորտներում (առողջապահական, բնապահպանական) կազմակերպվող միջազգային դասընթացներին, աշխատաժողովներին, համաժողովներին և խորհրդաժողովներին և կարողունությունների զարգացման հնարավոր այլ միջոցառումներին մասնակցելու համար բացառապես բոլոր այն դեպքերում, երբ այդ միջոցառումների խորագրում շեշտադրված է միջոցառումների երիտասարդական բնույթը կամ երիտասարդների՝ առաջնային թիրախ լինելը: